ANKARA, Turkye - President Recep Tayyip Erdogan het die bedanking van sy skoonseun uit die pos van minister van finansies aanvaar, het die Turkse leier se kantoor Maandag aangekondig.
'n Verklaring van sy kantoor het gesê Erdogan het Berat Albayrak se versoek "om van sy pligte verskoon te word" aanvaar, maar het nie gesê wie hom sal vervang nie.
Albayrak (42) het laat Sondag aangekondig dat hy om gesondheidsredes bedank en meer tyd saam met sy gesin sal deurbring.
Die land se gehawende geldeenheid het Maandag teen die dollar verstewig ná sy aankondiging, wat gekom het ná die afdanking oor die naweek van die sentrale bankhoof Murat Uysal en sy vervanging deur die voormalige minister van finansies, Naci Agbal.
Albayrak, wat vier kinders het saam met Erdogan se dogter Esra, het 'n rowwe tydperk in die Turkse ekonomie voorgesit. Die land was besig om te herstel van 'n geldeenheidskrisis in 2018 toe die koronaviruspandemie getref het en Albayrak se rentmeesterskap onder baie kritiek gekom het.
Die Turkse lira het sedert die begin van die jaar sowat 30% van sy waarde verloor en Vrydag 'n rekordlaagtepunt van 8.58 teenoor die dollar bereik, terwyl jaarlikse inflasie 11.89% bereik het.
“In 'n tyd toe selfs ontwikkelde lande ernstige ekonomiese swaarkry ervaar het weens die koronaviruspandemie … het ons land die minimum hoeveelheid skade gely gedurende daardie kritieke tyd, danksy … Albayrak se pogings,” lui die verklaring van Erdogan se kantoor.
In 'n verklaring wat Maandag vrygestel is, het die nuwe sentrale bankhoof belowe om "beslissend alle beleidsinstrumente te gebruik in die nastrewing van (die sentrale bank se) prysstabiliteitsdoelwit."
"Die sentrale bank sal die huidige situasie beoordeel, verwagtinge hersien, ontwikkelinge noukeurig monitor, voor die bank se Monetêre Beleidskomiteevergadering op 19 November," het hy gesê.
Bron: elliotlaketoday.com
