İranın birinci vitse-prezidenti zorakılıqla bağlı bütün təşəbbüsləri pislədiklərini bildirib.
İranın birinci vitse-prezidenti Məhəmməd Rza Rəhimi zorakılıqla bağlı bütün təşəbbüsləri pislədiklərini bildirib.
Cümə axşamı Türkiyənin paytaxtı Ankarada Türkiyənin Baş naziri Rəcəb Tayyib Ərdoğanla birgə mətbuat konfransında danışan Rəhimi bütün zorakılıq hərəkətlərini pislədiklərini vurğulayıb.
“Siz hamınız tiran ölkələri və zorakılığı görmüsünüz. İran İslam Respublikası belə (tiran) ölkələrə qarşı bütün səylərə rəhbərlik etmişdir. Biz belə məsələlərdə Türkiyənin yanında olmuşuq”, - deyə Rəhimi bildirib.
“Çərşənbə günü Suriyanın cənub-şərqindəki Akçakale qəsəbəsinə artilleriya mərmilərinin düşməsi nəticəsində 5 türkün həlak olması və 9 nəfərin yaralanması ilə əlaqədar Baş nazir Ərdoğana və türk xalqına başsağlığı verirəm”, - deyə Rəhimi bildirib.
“Türkiyə bizim dəyərli qonşumuzdur. İran və Türkiyə (zəngin) mədəniyyət və sivilizasiyaya malik iki ölkədir. Sizə İran hökumətinin səmimi salamlarını çatdırıram”, - deyə Rəhimi qeyd edib.
“Zorakılıq nəticəsində tökülən bütün qanları pisləyirəm. Mən sadəcə olaraq zorakılıq ehtiva edən heç bir təşəbbüsü qəbul edə bilmərəm”, - deyə Rəhimi bildirib.
“Bizim təkallahlı dinimizin bir hissəsi olaraq, bir fərdin xilas edilməsinin bütün bəşəriyyətin xilas edilməsini nəzərdə tutduğuna inanırıq. Eynilə, bir fərdi öldürmək bütün bəşəriyyəti öldürmək deməkdir. Qurani-Kərim belə deyir”, - deyə Rəhimi vurğulayıb.
“Biz Türkiyə ilə əlaqələrimizi mümkün qədər inkişaf etdirmək niyyətindəyik. İki il əvvəl baş nazir Ərdoğan bizə səfər edəndə Türkiyə ilə ticarət dövriyyəmiz 5 milyard dollar idi. Bu gün ticarət dövriyyəmiz 16 milyard ABŞ dollarından çoxdur. Biz Ərdoğanla ticarət həcmimizi 30 milyard dollara çatdırmaq barədə razılığa gəldik”, - deyə Rəhimi bildirib.
Çərşənbə günü Suriyanın Türkiyəyə qarşı hücumundan sonra bir jurnalistin İranın Türkiyənin, yoxsa Suriyanın tərəfində olacağı sualına Rəhimi bütün zorakılıq hərəkətlərini qınadıqlarını vurğulayıb.
“Biz Türkiyə ilə qonşu olmaqdan qürur duyuruq. Baş nazir Ərdoğan dünyada öldürülən bütün günahsız insanlara görə dərin ağrılar keçirdiyini bildirib. Ərdoğanın ağrısını paylaşırıq”, - deyə Rəhimi bildirib.
(Anadolu Xəbər Agentliyi)
