Mae Intel wedi cyhoeddi bod ei brif weithredwr Paul Otellini yn mynd i ymddeol o’r cwmni.
Roedd Mr Otellini wedi bod gyda'r busnes, sef y gwneuthurwr microbroseswyr mwyaf yn y byd, ers bron i 40 mlynedd ac mae wedi bod yn brif weithredwr am yr wyth mlynedd diwethaf.
Bydd yn rhoi’r gorau i’r swydd ar ôl cyfarfod blynyddol cyfranddalwyr y cwmni sglodion ym mis Mai’r flwyddyn nesaf.
Mr Otellini oedd y pumed prif weithredwr yn hanes 45 mlynedd Intel.
“Rwyf wedi cael y fraint o arwain un o gwmnïau mwya’r byd,” meddai mewn datganiad.
“Ar ôl bron i bedwar degawd gyda’r cwmni ac wyth mlynedd fel Prif Swyddog Gweithredol, mae’n bryd symud ymlaen a throsglwyddo llyw Intel i genhedlaeth newydd o arweinyddiaeth.”
Bydd y cwmni nawr yn dechrau ar y broses o chwilio am olynydd iddo.
(BBC)
