Princo Karlo diris al la BBC en ekskluziva intervjuo, ke li ĉesos paroli pri politikaj aferoj kiam li fariĝos reĝo.
La Princo de Kimrujo jam de jardekoj publike parolas pri temoj kiel mediprotektado, kaj estas ankaŭ konata pro siaj (sufiĉe malfavoraj) opinioj pri moderna arkitekturo. Kaj li plurfoje alparolis membrojn de la registaropri aferoj, kiuj koncernis lin, kiujn multaj perceptis kiel enmiksiĝon en la kompetentecon de ministroj.
En privataj konversacioj, se ni kredas la rerakontojn de liaj interparolantoj, li faris pli sincerajn deklarojn, ekzemple, en 2014, supozeble komparis Vladimir Putin kun Hitler (La fakto, ke tiuj vortoj estis parolitaj, neniam estis oficiale konfirmita.)
Britaj monarkoj zorge evitas fari iujn ajn polemikajn aŭ disputigajn deklarojn.
En BBC-dokumentario elsendita okaze de lia venonta 70-a naskiĝtago, la heredonto de la brita trono emfazis, ke kiel monarko li devos agi ene de "konstituciaj parametroj".
Karlo notis, ke eĉ kiel kronprinco li neniam subtenis iun ajn politikan partion.
Samtempe, li rimarkigis, “estas grave memori, ke estas loko nur por unu reganto samtempe, ne por du. Do kiel reganto, vi ne povas esti la sama kiel la Princo de Kimrujo aŭ la heredanto.”
Demandite ĉu liaj publikaj agadoj daŭrus post lia surtroniĝo, Karlo respondis: "Ne, ĝi ne daŭros. Mi ne estas tiel stulta. Mi komprenas, ke esti suverena estas tute aparta afero. Do kompreneble mi plene komprenas kiel tio funkcius."
La filmistoj malantaŭ Prince, Son and Heir: Charles at 70 ricevis ekskluzivan aliron al la Princo de Kimrujo dum unu jaro. Princo Karlo fariĝos 70-jara la 14-an de novembro.
