Tha Intel air ainmeachadh gu bheil am prìomh oifigear aca, Paul Otellini, a’ dol a leigeil dheth a dhreuchd bhon chompanaidh.
Bha Mgr Otellini air a bhith leis a’ ghnìomhachas, a tha mar an neach-dèanamh meanbh-phròiseasairean as motha san t-saoghal, airson faisg air 40 bliadhna agus tha e air a bhith na phrìomh oifigear airson nan ochd bliadhna a dh’ fhalbh.
Leigidh e dheth a dhreuchd às dèidh coinneamh bhliadhnail luchd-earrannan a’ chompanaidh chip sa Chèitean an ath-bhliadhna.
B’ e Mgr Otellini an còigeamh prìomh oifigear ann an eachdraidh 45 bliadhna Intel.
“Tha e air a bhith na urram dhomh aon de na companaidhean as motha san t-saoghal a stiùireadh," thuirt e ann an aithris.
“Às dèidh faisg air ceithir deicheadan leis a’ chompanaidh agus ochd bliadhna mar Cheannard, tha an t-àm ann gluasad air adhart agus stiùir Intel a ghluasad gu ginealach ùr de cheannardas.”
Tòisichidh a’ chompanaidh a-nis air a’ phròiseas airson lorg a thoirt dha mar oighre.
(BBC)



