Նուլանդն ասել է, որ իրենք կասկած չունեն, որ Թուրքիայի կողմից կանգնեցված սիրիական ինքնաթիռը լուրջ ռազմական տեխնիկա էր տեղափոխում։
ԱՄՆ Պետդեպարտամենտի խոսնակ Վիկտորիա Նուլանդը հայտարարել է, որ իրենք կասկած չունեն, որ Թուրքիայի կողմից կանգնեցված սիրիական ինքնաթիռը լուրջ ռազմական տեխնիկա էր տեղափոխում։
Ամենօրյա մամուլի ասուլիսի ժամանակ պատասխանելով այն հարցին, թե արդյոք այդ ինքնաթիռում զենք կար, Նուլանդն ասել է. «Մենք թուրքական կողմից բավականին համապարփակ հաշվետվություն ենք ստացել այն մասին, թե ինչ են նրանք գտել: Բայց ես նրանց վրա եմ թողնելու հրապարակայնորեն կիսվել իրենց գտածով: Կարծում եմ՝ վարչապետ Ռեջեփ Թայիփ Էրդողանը բավականին վճռական հայտարարություններ է արել այդ մասին: Մենք կասկած չունենք, որ դա լուրջ ռազմական տեխնիկա էր»:
Մեկ այլ հարցի պատասխանելով՝ Նուլանդն ասել է. «Սիրիայի նկատմամբ Անվտանգության խորհրդի պատժամիջոցներ չկան, քանի որ Անվտանգության խորհրդի անդամներ Ռուսաստանը և Չինաստանը շարունակում են արգելափակել դրանք»։
«Մենք ասում ենք, ինչպես ասում ենք գրեթե մեկ տարի, որ ոչ մի պատասխանատու երկիր չպետք է օգնի և խրախուսի Ասադի ռեժիմի ռազմական մեքենան», - ասաց նա։
(Անատոլիա լրատվական գործակալություն)
