პოლონეთმა შეერთებულ შტატებთან გრძელვადიანი შეთანხმება გააფორმა რუსეთზე ენერგეტიკული დამოკიდებულების შემცირების ძალისხმევის ფარგლებში თხევადი გაზის შესყიდვის შესახებ, იტყობინება DS DW-ზე დაყრდნობით.
სააგენტო AP-ის ცნობით, ორივე მხარემ ეს გადაწყვეტილება ოთხშაბათს, 19 დეკემბერს გამოაცხადა.
როგორც აღინიშნა, პოლონეთის სახელმწიფო გაზის კომპანია PGNiG-მა და სან დიეგოში დაფუძნებული Sempra Energy-ის შვილობილმა კომპანია Port Arthur LNG-მ 2,7 წლის განმავლობაში ყოველწლიურად 20 მილიარდი კუბური მეტრი გაზის გაყიდვაზე შეთანხმდნენ. როგორც ერთობლივ განცხადებაშია აღნიშნული, ეს რაოდენობა საკმარისია პოლონეთის ყოველდღიური გაზზე მოთხოვნილების დაახლოებით 15 პროცენტის დასაკმაყოფილებლად. გარიგების ფინანსური დეტალები არ გახმაურებულა.
„ეს შეთანხმება პოლონეთის ენერგეტიკული დამოუკიდებლობისა და უსაფრთხოებისკენ გადადგმულ მნიშვნელოვან ნაბიჯს წარმოადგენს“, - განაცხადა აშშ-ის ენერგეტიკის მდივანმა რიკ პერიმ.
როგორც აღინიშნა, ბოლო კვირების განმავლობაში პოლონეთმა ასევე გააფორმა გრძელვადიანი გაზის ხელშეკრულებები რამდენიმე აშშ-ის მიმწოდებელთან, იმ ფონზე, როდესაც პოლონეთი და აშშ ცდილობენ შეაჩერონ გაზსადენის „ჩრდილოეთის ნაკადი 2“-ის მშენებლობა.
პოლონეთი, ისევე როგორც რიგი სხვა ქვეყნები, „ჩრდილოეთის ნაკადი 2“-ს პოლიტიკურ პროექტად მიიჩნევს, რომლის მიზანია უკრაინისთვის გაზის ტრანზიტული ქვეყნის სტატუსის ჩამორთმევა და ევროკავშირს რუსულ გაზზე დამოკიდებულების წინააღმდეგ აფრთხილებს. აშშ-ში გაზსადენის მშენებლობას ევროპის ენერგეტიკული უსაფრთხოებისა და ამერიკული ინტერესების საკითხებში უკან გადადგმულ ნაბიჯს უწოდებენ და სანქციების დაწესებით იმუქრებიან.
