თურქეთმა 65 ტონა დახმარება გააგზავნა, მათ შორის საკვები, სამზარეულოს ინვენტარი, საბნები და კარვები.
თურქეთის მიერ ფილიპინებისთვის გაგზავნილი ჰუმანიტარული დახმარება, რომელიც ისტორიაში ერთ-ერთი ყველაზე მასშტაბური კატასტროფის მსხვერპლი გახდა, სტიქიის ზონაში ჩავიდა.
გაეროს მონაცემებით, ტაიფუნ „ჰაიანის“ შედეგად, რომელმაც პარასკევს ფილიპინების რამდენიმე ცენტრალურ კუნძულს დაატყდა თავს, ოთხნახევარი მილიონი ადამიანი დაზარალდა, რის შედეგადაც დაახლოებით 330 ათასი ადამიანი უსახლკაროდ დარჩა.
ორშაბათს, თურქეთის ვიცე-პრემიერი ბეშირ ათალაი ფილიპინებში ჩავიდა, რათა სტიქიის ზონაში ჰუმანიტარული კრიზისის მდგომარეობა ადგილზე გაეცნო.
ათალაიმ განცხადება დედაქალაქ მანილაში, ფილიპინების წითელი ჯვრის წარმომადგენლებთან ჰუმანიტარული დახმარების გადაცემისას გააკეთა და განაცხადა, რომ თურქეთი მზადაა ფილიპინებს ყველანაირი დახმარება გაუწიოს.
ფილიპინების წითელი ჯვრის პრეზიდენტმა რიჩარდ ჯ. გორდონმა, თავის მხრივ, ატალაის დახმარებისთვის მადლობა გადაუხადა და დასძინა, რომ გაჭირვებულ ადამიანებს ჰუმანიტარული დახმარება მიეწოდებათ.
თურქეთის სახელმწიფო ჰუმანიტარულმა ორგანიზაციამ „ტურკ კიზილაი“ (წითელი ნახევარმთვარე) ორშაბათს, სტიქიით დაზარალებულ ფილიპინებში 65 ტონა დახმარება გააგზავნა, მათ შორის საკვები, სამზარეულოს ინვენტარი, საბნები და კარვები.
ამასობაში, ფილიპინებში ტაიფუნმა, რომელმაც ადამიანებისა და ქონების დაკარგვა გამოიწვია, სამხრეთ ჩინეთში რვა ადამიანი იმსხვერპლა, ხოლო ოთხი ადამიანი დაკარგულად ითვლება.
ადგილობრივი ხელისუფლების წარმომადგენლების განცხადებით, ტაიფუნმა 700 მილიონი აშშ დოლარის ეკონომიკური ზარალი გამოიწვია სოფლის მეურნეობაში, სატყეო მეურნეობაში, მეფრინველეობასა და თევზჭერაში. ჰაიანის ზემოქმედება სამხრეთში შემცირდა, თუმცა მოსალოდნელია, რომ წვიმა და შტორმი კიდევ დიდხანს გაგრძელდება.
გარდა ამისა, აშშ-მ განაცხადა, რომ ფილიპინებში სამძებრო-სამაშველო ოპერაციებისა და ჰუმანიტარული დახმარების გასაწევად ავიამზიდ USS George Washington-ს და სხვა ამერიკულ გემებს აგზავნის.
კანადის საგარეო საქმეთა სამინისტროს ცნობით, სამშაბათს კანადამ გაგზავნა C-17 თვითმფრინავი, რომელიც ჯარისკაცებს, აღჭურვილობასა და აუცილებელ მასალებს გადაჰყავდა.
AA
