Malbatên bajarê Helebê yê Sûriyê di veşartina termên kuştiyên xwe de zehmetiyê dikişînin ji ber ku şer û pevçûnên dijwar di navbera opozîsyona Sûriyê û hêzên Esed de berdewam in.
Ji ber ku leşkerên Esed hemû goristanên Helebê dorpêç kirine, şêniyên Helebê neçar in ku hezkiriyên xwe li baxçe, parkên zarokan an qadên futbolê binax bikin.
Welatiyê Helebê Ebû Selman ji Anadolu Agencyê (AA) re axivî û got: "Ji dema ku leşkerên Esed goristan dorpêç kirin, gel dest bi definkirina miriyên xwe li parkan kir."
Selman destnîşan kir, "Endamê Artêşa Azad a Sûriyeyê (AAS) yekem kes bû ku li parkeke herêmî hat definkirin."
"Bi zêdebûna hejmara qurbaniyan re, dîtina goran li deverên niştecihbûnê bûye beşek normal ji jiyanê," Selman herwiha got.
Di vê navberê de her ku diçe zêdetir Sûriyeyî piştî ku ji pevçûnên li Sûriyeyê reviyane derbasî Tirkiyeyê dibin.
Roja Înê 58 welatiyên Sûriyê ku di nav wan de çend berpirsên leşkerî yên pilebilind û malbatên wan jî hene, bi rêya gundê Bukulmez ê girêdayî parêzgeha Hatayê derbasî Tirkiyê bûn.
Ji aliyekî din ve, fermandarê giştî yê Artêşa Niştimanî ya Sûriyê (SNA) General Mihemed Husên El-Hac Elî diyar kir ku “Encûmena Niştimanî ya Sûriyê bi xwe têrê nake ku hemû beşên civaka Sûriyê hembêz bike”.
"Dê di 4ê Mijdarê de li Dohaya Qatarê civînek were kirin ku tê de SNC dê ji nû ve were avakirin. Ez hêvî dikim ku ji bo hêsankirina yekitiya siyasî komên din jî ji bo civînê werin vexwendin. Dibe ku ev yekîtî di pêşerojê de hikûmeta veguhêz pêk bîne," el-Hac Elî tekez kir.
"SNA di peydakirina çekan û hêsankirina ketina çekan bo Sûriyê de zehmetiyan dikişîne," el-Hac Elî jî got.
(Ajansa Nûçeyan a Anadoluyê)
