Karman, mpikatroka Yemenita: 'Mampanahy ihany koa ny zava-mitranga any Ejipta amin'ny hoavin'ireo firenena miaina Lohataona Arabo'.
Ilay Yemenita mpiaro ny zon'olombelona Tawakkol Karman, vehivavy Arabo voalohany nahazo ny loka Nobel ho an'ny fandriampahalemana 2011, dia nilaza fa ny fanonganam-panjakana ara-miaramila tany Ejipta, izay nanongana ny filoha voalohany voafidy tamin'ny fomba demokratika, Mohammad Morsi, dia nanamafy ny fifanolanana fa tsy nitady vahaolana tamin'izany.
“Tsy afaka nanao ny adidiny tamin'ny fomba marina nandritra ny herintaona i Morsi noho ny sakana amin'ny governemanta aloka,” hoy i Karman niresaka tamin'ny masoivoho Anadolu. “Nosamborin'ny tafika ireo mpikambana ao amin'ny Firahalahiana Miozolomana, namono ny sasany tamin'izy ireo, ary nanakatona ireo andrim-pampahalalam-baovao. Tsy natao ho an’ny safidim-bahoaka izany fa fanonganam-panjakana mazava ho azy”.
Nohamafisin'i Karman fa nanohitra ny demokrasia sy ny revolisiona tao Ejipta ny fanonganam-panjakana, nilaza i Karman fa tsy afaka manome antoka ny marimaritra iraisana ao amin'ny firenena ny tafika.
“Mampanahy ny hoavin'ireo firenena niaina Lohataona Arabo ihany koa ny zava-mitranga any Ejipta,” hoy izy naneho ny faniriany ny fiverenan'ny demokrasia ao amin'ny firenena.
Vao haingana izy no nanaisotra ny fanohanana teo aloha ho an'ny hetsi-panoherana tany Ejipta hanoherana ny mpitarika voaongana ankehitriny Mohamed Morsi.
“Niharan'ny tsikombakomba lehibe tsy haiko ny habeny aho, ary miala tsiny amin'ny tontolo malalaka rehetra amin'ny fandraisako anjara amin'ny fitakiana ny fialàn'ny filoha voalohany voafidy tamin'ny fomba demokratika tany Ejipta,” hoy izy tao amin'ny kaonty Facebook-ny.
