Agence France-Presse
AP Photo
Ny lalàm-panorenana Syriana vaovao hofidiana amin'ny faran'ity volana ity dia mamarana amin'ny fomba mahomby ny fitondran'ny Antoko Baath efa ho dimypolo taona, araka ny lahatsoratra.
Ny lalàm-panorenana natolotra, izay hatao latsa-bato amin'ny 26 Febroary, dia manafoana ny andininy faha-8 amin'ny sata taloha izay nanambara ny Antoko Baath, teo amin'ny fitondrana nanomboka tamin'ny 1963, ho “mpitarika ny fanjakana sy ny fiarahamonina”.
Nanapa-kevitra ny filohan'i Syria Bashar al-Assad hanao fitsapan-kevi-bahoaka momba ny lalàm-panorenana vaovao amin'ny 26 Febroary, hoy ny tatitry ny masoivohom-baovaom-panjakana SANA androany.
“Namoaka didim-panjakana ny filoha Bashar al-Assad androany Alahady 26 Febroary ho datin'ny fitsapan-kevi-bahoaka momba ny volavolan-dalàm-panorenana”, hoy ny tatitry ny SANA.
Nilaza ny fahitalavi-panjakana Syriana fa ny lalàm-panorenana vaovao dia hamela ny “vahoaka hitantana ny vahoaka” eo ambanin'ny rafitra demokratika vaovao misy antoko maro.
Nilaza izy io fa eo ambanin’ilay lahatsoratra naroso, dia “zo masina” ny fahalalahana, ary ny fanitsakitsahana ny fahalalahan’ny tena manokana dia heverina ho heloka azo sazian’ny lalàna.
Tamin'ny alahady, nisy vaomiera niandraikitra ny fananganana lalàm-panorenana vaovao nanolotra volavolan-dalàna ho an'i Assad, hoy ny tatitra nataon'ny SANA, ary nampiany fa handinika izany izy ary handefa izany any amin'ny Antenimieram-bahoaka alohan'ny latsa-bato.
Tamin'ny volana Janoary, nilaza i Assad fa misy lalàm-panorenana vaovao novolavolain'ny komity natsangana tamin'ny volana oktobra hisolo ny ankehitriny, izay mametraka ny andraikitry ny antoko Baath.
Tamin'izany fotoana izany dia nilaza izy fa azo atao amin'ny fandatsaham-bato amin'ny fiandohan'ny volana martsa izany, na dia efa naroso aza io datim-pifidianana io.
Nesorin'ny governemantan'i Syria ny fanjakana maika tamin'ny Aprily tamin'ny taon-dasa ary tamin'ny volana Jolay dia namoaka lalàna mamela rafitra politika misy antoko maro.
