Најголемиот дел од напливот на бегалци се должи на 9,000 кои избегаа во Турција, вклучително и повеќе од 70 кои беа ранети, рекоа претставници на ОН. Јордан и Либан апсорбираа уште по 1,000 бегалци.
Во граѓанската војна во Сирија загинаа повеќе од 36,000 луѓе од почетокот на бунтот против режимот на претседателот Башар Асад во март 2011 година.
Тој рече дека ескалацијата - многу повеќе од просечните 2,000 до 3,000 Сиријци кои бегаат дневно - го зголемува бројот на сириски бегалци регистрирани во агенцијата на повеќе од 408,000.
Новите пристигнувања го зголемуваат бројот на бегалци во Турција на околу 120,000.
Турските медиуми прикажаа видео од бегалци како се качуваат низ бодликавата жица што ги дели двете земји. Портпаролот на агенцијата за бегалци на ОН, Адријан Едвардс, изјави за Асошиетед прес дека бегалците преминале во турската погранична провинција Шанлиурфа.
„Тоа се луѓе кои бегаат од борбите меѓу (бунтовничката) Слободна сириска армија и владата на Сирија, вклучително и повеќе од 70 ранети и двајца за кои се наведува дека загинале“, рече Едвардс.
Турски официјален претставник рече дека Сиријците главно бегаат од борбите во градот Харем, во северната сириска провинција Идлиб, како и од насилството во сирискиот град Рас ал-Ајн во североисточната провинција Ал-Хасака, каде што бунтовниците ја презедоа контролата од Силите на Асад. Службеникот зборуваше под услов да остане анонимен во согласност со владините правила кои им забрануваат на државните службеници да зборуваат со новинари без овластување.
Регионалниот хуманитарен координатор на ОН за Сирија, Радхуан Нуисер, рече дека блискоисточната нација гледа немилосрдно зголемување на насилството, страдањето, раселувањето и загубите „а цивилните Сиријци продолжуваат да ја плаќаат цената“.
Тој рече дека претставниците на ОН, исто така, се загрижени дека во последните недели Курдите и Палестинците се повеќе се вовлекуваат во борбите.
Претходно, државната агенција Анадолу јави дека група сириски војници, меѓу кои двајца генерали и 11 полковници, побегнале во Турција со нивните семејства и биле однесени во камп во кој се сместени воените дезертери, вклучително и десетици други генерали.
Видео снимката на Агенција Анадолу покажува дека Сиријците ја прескокнуваат и се качуваат низ оградата од бодликава жица што е дел од границата долга 911 километри (566 милји), за да преминат во турскиот пограничен град Џејланпинар.
Обединетите нации предупредуваат дека бројот на луѓе во Сирија на кои им е потребна хуманитарна помош може нагло да се зголеми, од 2.5 милиони сега на 4 милиони до почетокот на следната година, доколку граѓанската војна продолжи со смртоносното темпо.
Џон Гинг, оперативен директор за хуманитарната канцеларија на ОН, рече дека ОН, исто така, предвидуваат дека неуспехот да се стави крај на борбите ќе доведе до зголемување на бројот на Сиријци кои бегаат во соседните земји, од речиси 400,000 во моментов на околу 700,000 на почетокот на 2013 година. .
Гинг зборуваше во интервју за АП пред петочниот хуманитарен форум за Сирија во Женева, каде меѓу 350 и 400 претставници на влади, меѓународни организации и хуманитарни групи слушнаа извештаи за нагло влошувањето на хуманитарната ситуација во Сирија.
„Луѓето треба да бидат свесни колку е очајна ситуацијата во Сирија за луѓето таму, колку е неподнослива и како тие страдаат и запаѓаат во сѐ подлабок очај и хуманитарна потреба“, рече Гинг. „Само многу брзо станува многу полошо за обичните луѓе“.
Градоначалникот на Џејланпинар, Исмаил Аслан, изјави за АП по телефон дека сириските бунтовници во петокот ја презеле контролата врз зградата на безбедноста, еден ден откако бунтовниците го зазедоа и граничниот премин меѓу Џејланпинар и Рас ал Ајн. Режимските сили ги гранатираа позициите на бунтовниците во петокот наутро, но борбите стивнаа рано попладне, рече тој.
Училиштата во Џејланпинар беа затворени втор ден во петокот, а на жителите им беше кажано да не излегуваат од домовите.
Гласините дека силите на сирискиот режим ќе извршат воздушни напади врз Рас ал Ајн го забрзаа приливот на бегалци, рече друг официјален претставник во Џејланпинар, кој исто така сакаше да остане анонимен.
Бегалците беа однесени во блиските бегалски кампови или престојуваа кај турски роднини, рече тој.
(Вашингтон пост)
