Шефот на делегацијата на ЕУ во Босна, Петер Соренсен, рече дека се чувствува оптимист оти Босанците кои живеат во близина на Хрватска ќе добијат посебни картички за премин, наместо да мора да користат пасоши, по 1 јули.
Соренсен, шеф на делегацијата на ЕУ во Босна, рече дека се надева оти прашањата за граничните премини меѓу Босна и Хрватска ќе бидат решени до моментот кога Хрватска ќе се приклучи на ЕУ во јули.
Засега, Босанците ќе треба да користат пасоши за да влезат во Хрватска по јули, иако властите на двете земји се обидуваат да воспостават посебен режим со кој Босанците кои живеат во близина на границата ќе можат да преминуваат само со користење на картички.
Соренсен рече дека имало неколку состаноци за ова прашање и наскоро ќе се појави решение за граѓаните кои живеат во пограничните области.
Босна и Хрватска ја делат границата долга околу 1,000 километри. Се проценува дека илјадници Босанци ја преминуваат и повторно ја преминуваат границата секој ден. Многумина се босански Хрвати со работа, дом и семејство во соседна Хрватска.
„Пограничната област“ во Босна и Херцеговина се смета за зона која се протега длабоко 30 километри на националната територија.
Доколку се дозволат посебни картички, жителите на овие области не би морале да ги носат своите пасоши при преминувањето на хрватската граница.
Хрватска веќе почна да издава картички за гранични премини за своите граѓани кои живеат во зоната на пет километри од границата со Босна, но Босна не го стори истото.
Тоа е затоа што босанската влада на државно ниво не го прифати предлогот на државната агенција задолжена за издавање на граничните картички поради технички недостатоци.
Но, шефот на босанската комисија за интегрирано управување со границите, Миро Џакула, неодамна рече дека има време да се реши ова прашање бидејќи Босна и Хрватска треба да потпишат нов договор за границата пред Хрватска да се приклучи на ЕУ.
Тој додаде дека според нацртот на новиот договор, Хрватска ќе издава посебни гранични картички за граѓаните на Босна и Херцеговина и обратно.
Balkan Insight
