Невозможно е повеќе да се градат нуклеарни централи во демократските земји, бидејќи нема јавна поддршка за тоа, изјави вчера истакнат германски политичар на Зелените.
„Нуклеарните централи ќе се градат само во диктатури или полудиктатури“, рече Џем Оздемир, копретседател на германската Зелена партија.
Тој ја критикуваше политиката на Турција поради изборот за изградба на нуклеарни централи, велејќи дека е бизарно да се види Турција да тргне по патот што развиениот свет го напушта.
Оздемир зборуваше на настанот за воведување програма за истражување на стипендии, заедничка иницијатива помеѓу Истанбулскиот политички центар на Универзитетот Шабанџи и германската фондација Меркатор. Соработката меѓу двете институции е опишана како најголема турско-германска заедничка иницијатива на граѓанско општество.
Потсетувајќи дека Германија и Јапонија одлучија постепено да ги исфрлат нуклеарните централи, Оздемир рече: „Треба да му бидеме благодарни на креаторот што обезбедува сонце без надомест“. Тој додаде дека и Турција и Грција би можеле во иднина да и обезбедат на Европа соларна енергија.
Оздемир, исто така, рече дека е клучно да се укинат визите за турските бизнисмени за членките на ЕУ, додавајќи дека ако луѓето од земји како Србија и Хрватска можат да дојдат во Европа без визи, тоа треба да важи и за Турција.
Син на турско мигрантско семејство во Германија, Оздемир рече дека миграцијата порано била германска тема, но сега е тема и за Турција.
„Јас не зборувам само за синовите и ќерките на турските мигранти кои доаѓаат во Турција“, рече Оздемир, истакнувајќи дека германските граѓани кои доаѓаат во Турција се соочуваат со неколку проблеми кога станува збор за добивање дозволи за престој и работни дозволи од турските власти.
(Хуриет дејли њуз)
