Turkiga ayaa meesha ka saaraya wax wada hadal ah oo uu la galo maamulka Suuriya, wasiirka arrimaha dibadda Ahmet Davutoğlu ayaa sheegay Talaadadii, maalin kadib markii Moscow ay ku baaqday in wada xaajood lala galo Dimishiq oo ah habka kaliya ee lagu soo afjari karo colaadda sii kordheysa.
"Ma jirto wax micno ah in wadahadal lala galo maamul weli sii wada xasuuqa uu ku hayo shacabkiisa, xitaa inta lagu jiro (Iidda Muslimiinta) ee Ciidul Adxa," ayuu Davutoğlu ku yiri shir jaraa'id.
Wasiirka arrimaha dibadda ee Ruushka Sergei Lavrov ayaa ugu baaqay reer galbeedka iyo ciyaartoyda gobolka oo uu ku jiro Turkiga inay bilaabaan wada xaajoodka ay la yeelanayaan madaxweyne Bashar al-Assad iyo sidoo kale mucaaradka si loogu gogol xaaro xal siyaasadeed oo Suuriya, oo ay hareeyeen ku dhawaad 20 bilood oo colaad ah.
"Waa adag tahay in wax lagu guuleysto iyada oo aan wadahadal lala yeelan dowladda, taasina waa dhibaatada kaliya ee ku hartay waddada loo marayo geeddi-socod siyaasadeed," Lavrov ayaa yiri ka dib markii uu la kulmay Lakhdar Brahimi, ergeyga nabadda caalamiga ah ee Suuriya.
Davutoğlu ayaa sheegay in wadahadal lala yeesho Dimishiq, oo hal mar saaxiib la ah, ay noqon doonto tallaabo "sharciyeyn karta nidaamka jira inta ay rabshaduhu sii socdaan".
In ka badan 500 oo qof ayaa lagu soo warramayaa in ay ku dhinteen afartii maalmood ee Ciidda Muslimiinta in kasta oo xabbad joojintii uu dhexdhexaadinayey Brahimi, oo sheegay in dagaalka sokeeye ee Suuriya uu ka sii xumaanayo.
Brahimi, oo noqday ergayga Suuriya ka dib markii uu xilka banneeyay Kofi Annan oo isaga ka horreeyay, markii uu fashilmay qorshihiisii nabadda ee shanta qodob ahaa, ayaa bisha November la tagi doona golaha ammaanka ee Qaramada Midoobay, isaga oo wata hindise cusub oo uu ku riixayo wadahadallo dhexmara Asad iyo mucaaradka.
(Hürriyet Daily News)
