Presidenti Recep Tayyip Erdoğan dhe kancelarja gjermane Angela Merkel arritën në një marrëveshje të përbashkët të hënën gjatë Samitit Botëror Humanitar në Stamboll, që Turqia të vazhdojë negociatat e saj me institucionet e BE-së për udhëtim pa viza, sipas burimeve presidenciale.
Samiti Botëror Humanitar dy-ditor, nën kryesimin e Turqisë në Stamboll, mblodhi për herë të parë liderët më të rëndësishëm në botë për të trajtuar disa nga problemet humanitare më të vështira dhe për të gjetur zgjidhje për krizat globale.
Kancelarja gjermane Angela Merkel, një nga të ftuarit e profilit më të lartë në samit, zhvilloi bisedime me Presidentin Erdogan në margjinat e samitit të OKB-së.
Dyshja u përqëndrua në krizën siriane dhe procesin e udhëtimit pa viza të Turqisë në BE gjatë bisedës së tyre, sipas burimeve presidenciale. Erdoğan dhe Merkel thuhet se ranë dakord për nevojën e vazhdimit të bashkëpunimit për migracionin ilegal dhe arritën në një mirëkuptim të ndërsjellë për vazhdimin e bisedimeve të negociatave midis BE-së dhe Turqisë në lidhje me procesin e udhëtimit pa viza, duke marrë parasysh “ndjeshmëritë dhe prioritetet” e kësaj të fundit në luftën kundër terrorizmit.
BE-ja ka premtuar udhëtim pa viza për Turqinë si pjesë e marrëveshjes së migracionit, me kusht që Ankaraja të përmbushë kriteret duke përfshirë ndryshimet në ligjet e saj të gjera kundër terrorizmit. Qeveria turke ka thënë se vendi nuk mund të ndryshojë ligje të tilla në një kohë kur po lufton kërcënimin si nga terroristët e DEASH-it ashtu edhe nga PKK.
