Erdogan tha se Turqia nuk ka nevojë të kërkojë mandatin e askujt.
Kryeministri turk Rexhep Tajip Erdogan ka hedhur poshtë komentet e Iranit për vendosjen e mundshme të raketave Patriot përgjatë kufirit të Turqisë me Sirinë.
“Besoni në qeverinë tuaj, besoni në shtetin tuaj. Kur qeveria juaj, shteti merr një vendim për ndonjë gjë, ai e di se me kë duhet të konsultohet dhe e merr atë vendim dhe e ndjek. Ne nuk kemi nevojë të kërkojmë mandatin e askujt”, u tha Erdogan gazetarëve në përgjigje të një pyetjeje gjatë një konference për shtyp në kryeqytetin turk, Ankara.
Një ekip i NATO-s inspektoi instalimet ushtarake në provincën Malatya të mërkurën për të vlerësuar vendet e mundshme për vendosjen e raketave Patriot që Turqia kërkoi nga aleanca për të mbrojtur kufirin e saj me Sirinë.
Një këshilltar i lartë ushtarak i liderit suprem të Iranit, Ali Khamenei, u citua nga një agjenci iraniane e lajmeve më herët sot të ketë thënë se vendosja e raketave Patriot “do t'i kushtojë Ankarasë më shumë se sa më parë nëse raketat janë pjesë e një përgatitjeje për ndërhyrje në Siri. ”
Shtetet e Bashkuara, Gjermania dhe Holanda janë të vetmet anëtarë të NATO-s që kanë në arsenalet e tyre raketa Patriot.
Gjatë luftërave në Irak të 1991 dhe 2003, NATO vendosi raketa Patriot në Turqi, por ato nuk u përdorën kurrë.
(Për historinë origjinale, ju lutem kliko)
Raportohet nga Agjencia Anatolia
