Kryeministri Daçiq i konsideron të papranueshme kushtet e reja të BE-së për Kosovën, pasi Brukseli i kërkon Serbisë të respektojë integritetin territorial të Kosovës.
Kryeministri serb Ivica Daçiq tha se ai ishte "seriozisht i shqetësuar" nga Strategjia e re e Zgjerimit të Komisionit Evropian, e cila i ka thënë Beogradit se duhet të respektojë integritetin territorial të Kosovës nëse dëshiron të përparojë drejt anëtarësimit në BE.
Serbia nuk e njeh pavarësinë e ish krahinës së saj, të shpallur në vitin 2008.
“Jam thellësisht dhe seriozisht i shqetësuar nga këto kërkesa, të cilat në vend që të ndihmojnë [Serbinë dhe Kosovën] për të vazhduar dialogun e tyre, në fakt mund t'i japin fund bisedimeve,” tha Daçiç pas marrjes së Raportit të Progresit të BE-së për Serbinë.
“Ndoshta do të kishte qenë më e ndershme [e BE-së] të kërkonte njohjen e drejtpërdrejtë të pavarësisë së Kosovës sesa të kërkonte nga ne që të respektonim integritetin e tyre shtetëror,” shtoi ai.
Reagimi i inatosur i Daçiqit erdhi pasi komisioneri i BE-së për Zgjerimin, Stefan Fule, bëri thirrje për një përmirësim të dukshëm dhe të qëndrueshëm të marrëdhënieve ndërmjet Serbisë dhe Kosovës, duke përfshirë respektimin e integritetit territorial të Kosovës.
“Ky proces duhet të rezultojë gradualisht në normalizimin e plotë të marrëdhënieve ndërmjet Serbisë dhe Kosovës me perspektivën që të dyja të jenë në gjendje të ushtrojnë plotësisht të drejtat e tyre dhe të përmbushin përgjegjësitë e tyre brenda Bashkimit Evropian”, tha Fule.
“Trajtimi i problemeve në Kosovën veriore [të drejtuar nga serbët], duke respektuar integritetin territorial të Kosovës dhe nevojat e veçanta të popullatës lokale, do të jetë një element thelbësor i këtij procesi”, shtoi ai, duke iu referuar pjesës veriore të Kosovës ku Beogradi drejton efektivisht autoritetet lokale.
Strategjia e Zgjerimit të BE-së i njeh rezultatet e dialogut Kosovë-Serbi në aspektin e marrëveshjeve për bashkëpunim rajonal, për përfaqësimin e Kosovës në takimet rajonale dhe për menaxhimin e kufirit.
Por vëren se zbatimi i marrëveshjeve ka qenë i pabarabartë.
“Udhëheqja e re e Serbisë ka nënvizuar angazhimin e saj për të zbatuar të gjitha marrëveshjet e arritura tashmë në dialogun me Prishtinën, si dhe për të filluar trajtimin e çështjeve më të gjera politike,” thuhet në raport.
“Serbia ende duhet të arrijë progres të mëtejshëm drejt një përmirësimi të dukshëm dhe të qëndrueshëm të marrëdhënieve me Kosovën, prioriteti kryesor i përcaktuar në Opinionin e Komisionit për aplikimin e Serbisë për anëtarësim,” shton ai.
“Pas zgjedhjeve dhe marrjes së detyrës nga një lidership i ri në Serbi, Serbia duhet të vazhdojë të angazhohet në mënyrë konstruktive në fazën tjetër të dialogut në mënyrë që të arrijë përparim të mëtejshëm drejt një përmirësimi të dukshëm dhe të qëndrueshëm të marrëdhënieve me Kosovën”, vijon ai.
(Balkan News)
