ITurkey iyeka ukuxoxisana nombuso waseSyria, kusho uNgqongqoshe Wezangaphandle u-Ahmet Davutoğlu ngoLwesibili, ngemuva kosuku iMoscow icele ukuthi kube nezingxoxo neDamaseku njengendlela kuphela yokuqeda ukungqubuzana okwandayo.
"Asikho isidingo sokuxoxisana nombuso oqhubeka nokwenza isibhicongo esinjalo kubantu baso, ngisho naphakathi (nomkhosi wamaSulumane) we-Eid al-Adha," kusho uDavutoğlu esithangamini sabezindaba.
UNgqongqoshe Wezangaphandle waseRussia u-Sergei Lavrov ucele abadlali baseNtshonalanga kanye nesifunda saseTurkey ukuthi baqale ukuxoxisana noMongameli u-Bashar al-Assad kanye namaqembu aphikisayo ukuze kuvulwe indlela yesixazululo sezepolitiki eSyria, ehlaselwe cishe izinyanga ezingama-20.
"Akukho okuzofezwa ngaphandle kokuxoxisana nohulumeni, futhi yiyona kuphela inkinga esasele endleleni eya enqubweni yezombusazwe," kusho uLavrov ngemuva komhlangano noLakhdar Brahimi, isithunywa sokuthula samazwe ngamazwe eSyria.
UDavutoğlu uthe inkhulumomphendvulwano neDamaseku, umbimbi wayo wesikhathi esisodwa, kuzoba yisinyathelo "esingavumela umbuso okhona njengoba udlame luqhubeka".
Kubikwe ukuthi bangaphezulu kuka-500 abantu abashonile ngesikhathi seholidi lezinsuku ezine le-Eid yamaMuslim naphezu kwesivumelwano esidalwe uBrahimi, owathi impi yombango eSyria ilokhu iqhubeka isuka kokubi iya kokubi kakhulu.
UBrahimi, owaba yinxusa laseSyria ngemuva kokuthi umanduleli wakhe u-Kofi Annan eshiye phansi izintambo ngesikhathi uhlelo lwakhe lokuthula olunamaphuzu amahlanu lungaphumeleli, uzoya kuMkhandlu Wezokuphepha we-UN ngoNovemba neziphakamiso ezintsha zokuthi kuqhutshekwe nezingxoxo phakathi kuka-Assad namaqembu aphikisayo.
(I-Hürriyet Daily News)
